نصائح ذهبية لكل بنت محجبة ازاي تتعامل صح مع الحجاب

أصبح البديل للكوافير والبحث عن قصة جديدة أو لون
مختلف هو لف الطرحة بألوان زاهية على آخر موضة.. أشكال ربطات على هيئة
تسريحة شعر "ضفيرة وكحكة"، وأما الأقمشة "تل" و"شيفون" "وترتر"،الصبح
والظهر وفي كل وقت... المعادلة الصعبة في كل الحاجات دي ازاي أكون محجبة
أحترم "حجابي" وفي نفس الوقت شكلي حلو "ستايل" على الموضة ومش "مبهرج"
ولافت للنظر لدرجة تثير انتقاد الآخرين.

ــ نصائح ذهبية لكل بنت محجبة ازاي تتعامل صح مع الحجاب..

ألوان الموضة في الإيشاربات لون الطرحة حسب لون اللبس ولكن اللون البني
بيدخل معاه البرتقالي, التركواز, الروز, الزيتي بدرجاته, البني لوحده,
البني المحروق مع البني العادي موضة جداً واستخدام الألوان الجديدة
وتداخلها بيعطي نتيجة حلوه جداً..البني جميل جداً مع كل ألوان البشرة، كل
الألوان تليق على البشرة السمراء أو البيضاء بنفس الدرجة، حكاية إن الروز و
الموف لا تصلح للبشرة السمراء أو إنه "بيسمر جداً"
ده كلام مش صحيح، النهارده مافيش لون صريح.. الروز له درجات مختلفة وموجودة
في كل أنواع المكياج، كمان الموف والأخضر.. المهم اختيار الدرجة من اللون
القريبة من درجة لون البشرة وأكيد هتكون مناسبة ولا تعطي نتيجة عكسية .

ــ نوع القماشه و خامة الايشارب :

نوع القماش أو خامة الإيشارب تعتمد على نوع اللبس، كمان فيه أنواع من
الأقمشة من المفضل نتجنبها حتى لو عجبك لونها أو تطريزها أو نقشتها.. من
الأقمشة المزعجة في لبس الحجاب "الأوراجنزا الهايشة"
ابعدي عن الأقمشة "الناشفة" لأنها صعبة في الربط، خلي عنيكِِ على نوعية
الأقمشة الناعمة والأقطان، الحرير على قطن، الشيفونات بأنواعها كلها خامات
حلوة جداً ومناسبة وعملية والتل كمان... الإيشارب مهم إنه يكون عملي في
اللف، ممكن الإيشارب يكون غالي ووحش في ربطته وبعد شوية هتكرهي الإيشارب و
ده بعد ما غرمتي ثمنه.

ــ نوعية القماش المناسبة والعملية للبنت في الجامعة عشان يكون حجابها مريح وفي نفس الوقت شكلها مش مبهدل؟

تختار الأقطان والشيفونات المطفية "بدون لمعة".. الأقمشة دي بتستحمل جداً
الحركة طول النهار، فالأقطان فيها ألوان كثيرة وأشكالها حلوة جداً، والقطن
على حرير فيه تطريز خفيف حلو كمان وموضة جداً يكون في طرف الإيشارب تطريز
أو ترتر بس المهم يكون بسيط جداً.. عشان الجامعة ممكن تختار الإيشاربات
الأقطان المخططة أو المنقوشة، فيه مساحة تنوع وألوان ينفع تدخل مع بعض تعطي
شكل جديد في كل مرة ، والتطريز البسيط يعطى جمال ورقة .

ــ أفكار لحجاب ممكن يناسب لفترة بعد الظهر أو بالليل؟

ممكن تحتفظي بشكل ربطتك اللي بترتاحي معاها والمناسبة لشكل واستدارة الوجه
وتستخدمي إكسسوار مختلف.. حلق كبير، سلسلة فيها دلاية فيها حجر فيروزي،
خاتم فضي بفص ملون.. النهارده مافيش لبس
محدد للنهار وآخر لليل، مساحة الحركة تكون إضافة حاجة جديدة للبسك حسب وقت الخروج وطبعاً المناسب للمكان.

يـــتبــــــــــــــــع

ــ ازاي البنت المحجبة تختار الربطة المناسبة لشكلها؟

لازم
تعرف هي بتحب إيه، الربطة التقليدية أو الربطة "الاسبانش" المربوطة "على
ورا" عشان تكون مرتاحة ومقتنعة بربطة الإيشارب، ولو هي محجبة جديد ما
تستعجلش على نفسها "شوية..... شوية" مش معقول هتقدر تلف الإيشارب زي واحدة
متحجبة من زمان.. البنات بتكتئب وبتزعل قوي عشان شكل حجابها مش مظبوط عشان
كده لازم المحجبة جديد تلبس في الأول حجاب ربطته سهلة ولا تستخدم أنواع
ناعمة جداً ممكن تتزحلق بسرعة وتظهر شعرها، ممكن تستخدم الأقطان في البداية
لأنها بتثبت، وعشان تلم شعرها كويس جداً تلبس "بونيه" قطن ولا تظهره،
ومهمته مساعدتها في تثبيت الإيشارب ويمسك الشعر كله وتختار ربطة سهلة.

ــ الربطة "الإسبانيش" موضة جداً، ازاي نربطها "صح" خطوة خطوة....؟

أولاً
نلبس بونيه قطن يلم الشعر كويس وبعد كده نجيب طرحة مستطيلة لون تاني، فلو
إن البونيه بني محروق تكون الطرحة تركواز تبين جزء من البونيه ونحط الطرحة
الثانية بمحاذاة خط البونيه ونربطها على ورا كويس جداً وممكن نجيب طرحة
تانية شيفون مثلاً وتكون لونها بني محروق ونربطها فوق التركواز، بعد كده
نبين جزء منها زي ما عملنا في الخطوة السابقة ونربط كويس جداً، بعد كده
نبدأ في ربط أطراف لطرحتين البني والتركواز بحيث ممكن نربط طرف الأولى مع
الثانية والعكس، وإنتِ قدام المرايا هتلاقي نفسك بتربطي الأطراف، وممكن
تبتكري تعملي الأطراف "كحكة" أو تعملي بطرف "كحكة" وتسيبي الطرفين نازلين
على كتفك على حسب ذوق وشكل وجهك.

ــ نصيحه للف الطرح التقليدية؟

لازم
تلبسي بونيه قطن وتحطي الإيشارب على حرف البونيه عشان يختفي وتمسكي الطرف
القصير بدبوس مشبك بالطرف الكبير وتلفي الطرف الطويل حول الرأس وتثبتي
بالدبابيس، وبلاش أكتر من إيشارب في الأول.. كفاية لفة بسيطة.

ــ لو عاوزة تدخل ألوان في اللفة التقليدية؟

زي
ما قلنا البونيه وبعد كده الإيشارب على حرف البونيه وبعدها تمسك الطرف
القصير بالطرف الطويل عند الرقبة، وبعد كده الإيشارب الثاني بعده بمسافة من
الأول وتمسك أطرافه وتلف طرف الأولى وطرف الثانية في اتجاه واحد بشرط طرف
يظهر لونه قبل الثاني، أو تحط الطرفين فوق بعض وتلفهم مرة واحدة وتحط
دبابيس للتثبيت.
ممكن تلبسى "بندانا" وتلف الطرحة، ونصيحتي بلاش وضع شريط بلاستيك في مقدمة الطرحة.

ــ إضافة الضفيرة من قماش وعمل "الكحكة" بالربطة "الإسبانيش"؟

لا
أفضل الإضافات الكثيرة للحجاب طالما اخترتِ الحجاب عن قناعة لازم تكوني
محتشمة وبسيطة في نفس الوقت... لازم تتعاملي مع الحجاب وكأنه شعرك وتحبيه
عشان شكلك يكون حلو فيه ولما توصلي للدرجة دي أكيد هتبتكري في الربطات أكثر
.

ــ نصيحه للعروسة المحجبة؟

تبحث
عن لون مناسب لبشرتها يبرز جمال لونها تفكر في موديل مناسب لها وتفكر ازاي
يكون شكلها مختلف وجديد، ومش شرط إن موديل أو ربطة عجبتك إنها ممكن تنفع
معاك أو تليق عليك، وكمان تختار حد يساعدها في ربط الطرحة يكون متخصص
وبيتحكم أكثر في الربط وله خبرة في ابتكار ربطات جديدة .

أتمنى أن أكون أفدتكم .

» صفات الحجاب الاسلامى
» كيف تتعامل مع الله؟
» ملابس للبنوتات القمرات مع الحجاب اشيك
» ربطات الحجاب وخاماتها وما يناسب وجهك ومناسباتك مهم جدا
» معلمة ودرس عن الحجاب